Društveni mediji iz ugla studenta

Ovaj blog post ću započeti sljedećim citatom: „Vrijeme je veliki učitelj. Nesreća je samo što ono ubija svoje učenike.“ Dakle, ako ne idete u korak s vremenom, bojim se, pregaziće vas.

Sve se više priča o tome kako bi svaki pojedinac trebao da ima svoj način nastupa na društvenim medijima. Dok drugi smatraju da društveni mediji oduzimaju vrijeme pojedincu i smanjuju njegovu angažovanost u raznim aktivnostima. Ja pripadam ovoj prvoj grupi, i nelogično mi je da neko nema profil na Facebooku, nalog na Twitteru, LinkedInu, ostalim mrežama i medijima.

Svaki student, menadžer, političar, novinar, fotograf, i oni koji imaju namjeru da postanu traženi u svojoj oblasti, moraju biti prisutni na internetu. Prije svega, tu je umrežavanje. Povezivanje sa ljudima iz vaše oblasti i sličnih interesovanja. Više se ne raspituju za vas kod poznanika, nego kod Googlea.

Svakodnevno čujem priču kako Facebook oduzima mnogo vremena. A na moje pitanje „tvitaš li?“, odgovara se „još mi to fali!“ Ja postižem da upravljam svojim profilima na više društvenh mreža i sajtova, čak stignem da napišem i po neki tekst za svoj blog. Nijesam nikakav Supermen, imam 24h kao i svi drugi. Stvar je u tome, zašto i kako koristiš sve te mreže, koje mogu mnogo da ti pomognu u pronalaženju posla, učenju, upoznavanju ljudi i svega što te zanima. Od skoro sam isključio chat na Facebooku, koristim ga samo u rijetkim situacijama, ali to vam može pomoći da manje ćakulate sa prijateljima koje svakako gledate svakodnevno. Uštedjeli ste na vremenu.

Ako krenete da tvitujete nailazićete na sve i svašta. Tamo vas prate i bitni i nebitni, lažni i pravi, smarači i interesantni likovi. Važno je da vi pratite ono što vas zanima. Jedna od odličnih stvari kada počnete da tvitate, jeste, što idete na (Tweet)Upove – skupljanja Tviteraša u kojima se online život preliva u real life. Na takvim mjestima možete ostvariti nova poznanstva i kontakte.

Kao student, smatram da su društvene mreže od višestukog značaja za sve, a posebno za studente. Zamislite da jedan student, koji treba da se zaposli negdje, nema LinkedIn profil? Pa šta on očekuje, da će ga na fakultetu naučiti kako da se zaposli? Neće, ali se preko LinkedIna, Facebooka, Twittera, može povezati sa drugim studentima i poslodavcima. Raspitivati se za razne mogućnosti mobilnosti studenata i iskustva prethodnika.

Iz svog iskustva, preporučujem svima da počnu da pišu svoj blog! Blog je fenomenalan način da se predstavite svima. Da iznesete svoje mišljenje i viđenje nekih stvari. Koristite ga da izgradite reputaciju na internetu. Nadam se da ću vidjeti mnoge nove blogove i blogere, a posebno u režiji studenata. Mnogi se ustručavaju da počnu sa pisanjem bloga jer misle da ne znaju da pišu. Čist primjer sam ja, nijesam nešto pametan, a pišem blog. Istražujem, dajem svoje mišljenje i neki to čitaju.

Ako se bavite režijom ili slično, onda je za vas savršen YouTube. Možete praviti razne snimke, kratke filmove, a od vaše kreativnosti i umijeća zavisi koliko ćete biti gledani. Ovakvi snimci često postanu viralni i obiđu svijet. Zašto vi ne bi obišli svijet?

Autor: Ivan Radonjić, Ivan blog

 

Gostujući bloger

Author: Gostujući bloger

Share This Post On

Vaše mišljenje: